BB

Bæ bæ, Bí Bí

15. maí 2015


King–bræður

King-bræðurnir (réttsælis frá vinstri): B.B., Stephen, Don og Larry.

Tónlistarmaðurinn B.B. King er látinn, 89 ára að aldri. Blúsuð sé minning hans. Hann var elstur þeirra King–bræðra og sá fyrsti til að kveðja. Hinir bræðurnir — Don, Larry og Stephen eru enn í fullu fjöri þrátt fyrir að vera allir komnir á aldur.

Bræðurnir ólust upp í vellystingum enda hafði faðir þeirra, Martin Luther King, Sr., hagnast verulega á hamborgarastað sínum, Burger King, sem hann stofnaði á fyrri hluta síðustu aldar.

Bræðurnir unnu á tímabili allir saman á veitingastaðnum ásamt föður sínum. B.B. steikti hamborgara, Stephen vaskaði upp, Larry var í bílalúgunni og Don þurrkaði af borðum.

Það var við uppvaskið sem Stephen fékk hugmyndirnar að sínum fyrstu bókum og skrifaði hann smásögur aftan á pappírsarkir sem settar voru á matarbakkana. Hann hefur í dag selt yfir 350 milljón eintök af bókum sínum.

Þá var Larry uppgötvaður af svöngum sjónvarpsstjóra sem pantaði sér kjúklinganagga í bílalúgunni. Hann hreifst af skýrri og ákveðinni rödd Larrys og bauð honum að koma í prufu hjá sjónvarpsstöðinni. Innan við mánuði síðar var Larry kominn með sinn eigin sjónvarpsþátt.

B.B. og Don voru tónlistarmennirnir í fjölskyldunni og stofnuðu þeir saman hljómsveitina Kings of Leon, en hún kom fyrst fram á árshátíð Burger King–starfsmanna og vakti mikla lukku. B.B. spilaði á gítar og Don söng ásamt því að sinna umboðsmennsku fyrir sveitina.

Burger King

Fyrsti Burger King–staðurinn — sá sem bræðurnir unnu á.

Kings of Leon sló í gegn og gaf út fjölmargar plötur sem seldust í bílförmum. Framtíð sveitarinnar er óljós, nú þegar B.B. er fallinn frá, en von er á fréttatilkynningu frá Don á næstu dögum.

Á Facebook–síðu sveitarinnar velta aðdáendur vöngum yfir því hver muni fylla í það skarð sem B.B. skilur eftir sig og er það einn maður sem oftast er nefndur.

Það er enginn annar en tónlistarmaðurinn Johnny King — fjarskyldur frændi bræðranna sem búsettur er á Íslandi.

Það er óskandi að eitthvað sé til í þessum sögusögnum og að Kings of Leon bætist þá í hóp Íslandsvina í kjölfarið.